Fréttir

Sveitarstjórnir Skaftárhrepps, Mýrdalshrepps, Rangárþings eystra, Rangárþings ytra og Ásahrepps hafa samþykkt að tillögu um að íbúar kjósi um sameiningartillögu á næsta ári. Ákvörðunin er meðal annars tekin með hliðsjón af niðurstöðum viðhorfskönnunar þar sem meirihluti svarenda taldi æskilegt að íbúar fengju að kjósa um málið

Í viðhorfskönnun sem Zenter rannsóknir gerðu meðal íbúa þeirra fimm sveitarfélaga sem eiga aðild að „Sveitarfélaginu Suðurlandi“ reyndust 69% þeirra sem tóku afstöðu hlynnt því að sveitarfélögin taki upp formlegar sameiningarviðræður sem enda með íbúakosningu, en um 16% andvíg. Í fjórum sveitarfélaganna er meirihluti svarenda fylgjandi viðræðum, en meðal íbúa Ásahrepps er nánast jöfn skipting á milli þeirra sem eru hlynntir og þeirra sem eru andvígir. Þátttakendur í könnuninni voru 877, eða um 20% íbúa svæðisins 18 ára og eldri.

Verkefnishópur ,,Sveitarfélagsins Suðurlands“ hefur lagt til við sveitarstjórnir Ásahrepps, Rangárþings eystra, Rangárþings ytra, Mýrdalshrepps og Skaftárhrepps að hafnar verði formlegar sameiningarviðræður sem lýkur með því að íbúar kjósa um sameiningu sveitarfélaganna á næsta ári. Sveitarstjórnirnar munu fjalla um tillöguna á fundum sínum í desember og taka endanlega ákvörðun.

Eftir fimm íbúafundi og samráð við íbúa liggur fyrir mjög mikið efni. Verkefnisstjórar hafa gert samantekt sjónarmiða og ábendinga sem fram komu á hverjum og einum íbúafundi.

Ensk og pólsk útgáfa kynningargagnanna frá íbúafundunum sem haldnir voru í sveitarfélögunum fimm dagana 19.-27. október er komin á vefinn.

Í kjölfar íbúafunda hafa borist fyrirspurnir um hvað það þýði að hefja formlegar sameiningarviðræður og hver munurinn sé á formlegum og óformlegum viðræðum.

Rafræni íbúafundurinn í Mýrdalshreppi náði til yfir 100 manns, sem var framar vonum. Það jafngildir því að yfir 15 þúsund manns mæti á fund í Reykjavík. Umræður voru mjög líflegar og áhugaverðar eins og á fyrri íbúafundum. Einar Freyr oddviti Mýrdalshrepps greip í gítarinn og tók lagið milli atriða við mikla hrifningu fundargesta. Rafrænir fundir geta vel verið skemmtilegir!

Útsendingin er á facebook síðu sveitarfélagsins

Frábær þátttaka var á íbúafundi í Rangárþingi eystra í gærkvöldi. Á fundinn mættu um 80 þátttakendur, en ljóst er að við nokkrar tölvur voru fleiri en einn að taka þátt. Auk þeirra fylgdust um 60 með útsendingu á Facebooksíðu Rangárþings eystra, þannig að fundurinn hefur náð til yfir 150 manns.